ఘనంగా కృష్ణ జన్మాష్టమి ఉట్ల వేడుక

భక్తులతో పోటెత్తిన ఆలయ ప్రాంగణం.. ఆధ్యాత్మిక శోభతో కళకళ

మహబూబాబాద్ , సెప్టెంబర్ 5:
శ్రీకృష్ణ జన్మాష్టమి పర్వదినాన్ని పురస్కరించుకుని  మహబూబాబాద్ జిల్లా కేంద్రంలో గోపాలస్వామి దేవాలయంలో ఉట్ల వేడుకలను భక్తిశ్రద్ధలతో ఘనంగా నిర్వహించారు. ప్రత్యేక పూజలు, అభిషేకాలు, భజనలు, కీర్తనలతో ఆలయ ప్రాంగణం ఆధ్యాత్మిక వాతావరణాన్ని సంతరించుకుంది. స్వామివారిని దర్శించుకునేందుకు భక్తులు పెద్ద సంఖ్యలో తరలిరావడంతో ఆలయ పరిసరాలు సందడిగా మారాయి.ఉట్ల వేడుకలో భాగంగా ఆలయ ప్రాంగణంలో ప్రత్యేకంగా ఉట్టిని ఏర్పాటు చేశారు. యువత, చిన్నారులు, భక్తులు ఉత్సాహంగా పాల్గొని ఉట్టిని కొట్టేందుకు పోటీపడ్డారు. కృష్ణుడి నామస్మరణలు, భక్తిగీతాలతో ఆలయ పరిసరాలు మార్మోగాయి. పలువురు చిన్నారులు శ్రీకృష్ణుడు, గోపికల వేషధారణలో ఆకట్టుకున్నారు.

ఈ సందర్భంగా ఆలయ నిర్వాహకులు భక్తులకు ఎలాంటి అసౌకర్యం కలగకుండా ప్రత్యేక ఏర్పాట్లు చేశారు. భక్తుల రద్దీ దృష్ట్యా క్యూలైన్లు, తాగునీరు తదితర సౌకర్యాలను ఏర్పాటు చేశారు. వేడుకల అనంతరం భక్తులకు తీర్థప్రసాదాలు పంపిణీ చేశారు.

కృష్ణ జన్మాష్టమి సందర్భంగా నిర్వహించిన ఉట్ల వేడుక భక్తులను విశేషంగా ఆకట్టుకుంది. సంప్రదాయాలు, ఆధ్యాత్మికతను ప్రతిబింబించేలా వేడుకలు సాగడంతో భక్తులు ఆనందం వ్యక్తం చేశారు.